لا أخفي عليكم أنني تعمدت عنونة هذا المقال كما عنونت لاستفزازكم و لضمان وصوله لأكبر عدد من المتابعين نظرا لأهمية ما جاء على لسان أحد رؤساء أندية الرابطات الجهوية الذي طلب منا عدم الكشف عن هويته … ضيفنا اليوم تحدث بمرارة لا تخلو من الفولكلور عن الوضعية الصعبة التي تعيشها نوادي الأقسام “السفلى” و أصر و ألح علينا أن ننقل الحوار الذي دار بيننا كما هو دون زيادة أو نقصان باللغة التونسية الدارجة : 

 

  • أنفوسبور : سيدي الكريم مرحبا بيك … 

  • الضيف : مرحبا … خويا طلبتكم حبيت نوصل صوتي و صوت كل رؤساء نوادي الرابطات الجهوية بخصوص الوضعية الصعيبة اللي قاعدين نمرو بيها و ان شاء الله نلقاو تجاوب منكم … 

  • أنفوسبور : أكيد مرحبا خويا في كل وقت … تفضل … 

  • الضيف : خويا و الله الشيء ينطق مالأجناب … المسؤولين على الرياضة في تونس كان ماعادش حاجتهم بينا ماهو يقولولنا خلينا نشدو ديارنا مسؤولين و ملاعبية و مدربين و نرتاحو مالعصب الكل ياخي الجامعة كيف تعطي مساعدات للناس الزواولة بعشرات الآلاف من الدينارات و تصنع في الكمامات و تعين في المحامين باش يرافعو على ملاعبية ما تعرفش اللي فما كوارث قاعدة تصير في فرق الرابطات الجهوية و ناس موش لاقية باش تاكل … خويا راني قد ما نحكيلك على الوضعية اللي يعيشو فيها الملاعبية راك ما تصدقش و حالات اجتماعية تبكي … الناس هاذم محتاجين لاعانات أكثر من برشة ناس خذات قفف و مساعدات مالجامعة … الملاعبي في فريق من الرابطات الجهوية اللي ما عندوش شهرية قارة و يخلص حسب النتائج اللي يحققها (مثلا في جمعيتي انتصار خارج القواعد ياخذو 100 دينار و داخل القواعد 70 دينار) و اللي عندو الزهر فيهم ياخو منحة امضاء ما تتجاوزش المليون و الا مليون و نص في أفضل الحالات يقعد يصرف منهم عام كامل و تلقاه معرس و بصغارو و كاري دار … ياخي يا رسول الله الملاعبية هاذم ما يستحقوش أنو الناس هاذم يوقفو معاهم و يعطيوهم حقوقهم اللي وعدوهم بيها على الأقل ؟؟؟ 

  • أنفوسبور : تحكي على ال 180 ألف دينار اللي وعدت الجامعة انها باش تصرفهم لنوادي الرابطات الجهوية و فرق كرة القدم النسائية ؟ 

  • الضيف : اللي يسمع 180 ألف دينار يقول حلولنا البحر … خويا راهو المبلغ هذا كيف تقسمو على عدد الجمعيات المعنيين (125 جمعية في الرابطات الجهوية و زيدهم فرق كرة القدم النسائية) تلقا باي كل فريق 1200 دينار … اذا أنا عندي 26 ملاعبي في الأكابر كيف نفرق عليهم ال 1200 دينار متاع سي وديع يجي باي كل واحد 46 دينار … ال 1200 دينار لاهم باش يزيدو و لاهم باش ينقصو أما حبينا نقولولهم يزيو ما استبلهتو الشارع الرياضي و استغليتونا لتلميع صورتكم و تحضير انتخاباتكم اللي سلبتولنا حتى حق المشاركة في التصويت فيها لأنو سي وديع و جماعتو اللي دايرين بيه يتعبو في حملتهم الانتخابية مع 125 فريق و يخافو أنو يخسرو الانتخابات بسببهم و بعد ما كانت الأندية متاع الرابطات الجهوية هي اللي تصوت ولاو رؤساء الرابطات هوما اللي يصوتو في عوضنا بقرار من سي وديع و من غير ما نكملك عاد تعرف البقية …. و من نهارتها خويا ولينا أقسام “سفلى” بالفم و الملا … خويا ال 1200 دينار راهم 400 يورو ما يجيوش حق السبيدري اللي يلعب بيه ملاعبي في الرابطة الأولى !!! و الجامعة أعلنت عليهم من نهار 24 مارس و أحنا اليوم 5 ماي و ما وصلنا شيء.

  • أنفوسبور : عندكم منحة الوزارة 20000 دينار !!! 

  • الضيف : خويا تحكي بجدك ؟ الوزارة مشكورة أما راهو ال 20000 دينار اللي تحكي عليهم و اللي يتصبو على مرتين (10000 دينار في أول الموسم و 10000 دينار وسط الموسم) و ما يوصلو يتصبو الا ما الريق يشيح زعمة باش نخلص بيهم الملاعبية و الا المدربين و الا مصاريف التنقل و الا باش نشري بيهم أزياء و ماتريال و الا شنوة بالضبط … الجامعة السنا ما عاونتناش لوكان بكورة … تي فما رؤساء جمعيات صاحبي باش تدخل للحبس في جرة شيكات بدون رصيد … 

  • أنفوسبور : ايه سامحني … علاش ما تطلبوش انتوما رؤساء نوادي الرابطات الجهوية الكل باش تقابلو رئيس الجامعة مثلا و تحكيو معاه على الظروف هاذي ؟

  • الضيف : خويا تصور انو الى يوم الناس هذا أحنا رؤساء أندية الرابطات الجهوية ما عندناش هيكل رسمي اللي ينجم يحكي باسمنا و قعدنا كل واحد يضرب على درابوه في خطة ممنهجة باش يخليونا ما عندنا وين نوصلو … هذاكا علاش قررنا تكوين ودادية رؤساء أندية الرابطات الجهوية لكرة القدم خلال الأسبوع و الا الأسبوعين المقبلين و أحنا توا بصدد جمع الانخراطات (أكثر من 30 رئيس نادي عبر عن رغبتو حتى لتوا في تكوين الودادية) 

  • أنفوسبور : خويا صوتك و صل و تأكد أنو الحوار باش يهبط كيما دار بيناتنا حرفيا و شكرا على الثقة … 

  • الضيف : لا شكرا ليك انت خويا على رحابة الصدر و ان شاء الله الناس تفيق شوية و الجامعة اللي نورمالمون معينة باش تشرف على الكورة في البلاد تتلها بفرق “القاع” و تعطيها حقها … صحيح ماناش قاعدين نطلعو في ميسي و رونالدو أما على الأقل شادين شباب نلهيو فيهم بالكورة باش ما يمشيوش يهملو و يفسدو و ياكلهم الشارع … 

 

عجبك الخبر ؟

مجموع الأراء 0 / 5. عدد الأراء : 0